معصب ولا حد يقرب صوبي .. !+مخالفات رادارات غبية

هالتدوينة تندرج تحت فضفضة حاجوني يمكن ما تفهمون شي والأفكار غير مرتبة .. لذا تم التنبيه ..

اليوم حالتي حالة ..

نفسيتي داون

.. وأحس بعوار على الجانب الأيمن أتوقع فوق الكلية او هي نفسها .. مادري هالعوار من شو .. لي أياااام أحس فيها  يوم أكح او أضحك أحس بالعوار مرات وانا أمشي ……بس صدق صدق العوار من الخاطر ..مرات أشك أقول شكلها الكلية هذه مضروبة ..والله المستعان

هذا غير المعدة المعتفسة من القولون  .. الله لا يبلاكم ..

وكنت أبغي أنام من التعب اللي فيني .. وأخوي الذكي راح فتح السيارة وطلع شريط(كاسيت) ونسى المفتاح في السيارة وأغلق الباب .. وأصلاً هالمفتاح هو الوحيد عندي ماشي مفتاح احتياط ..الحين كيف أروح الدوام الصبح ؟ شو الحل ؟

الحل ؟ ضربته شوي..وعصبت عليه .. هزبته وسحبت منه السوني 3 .( توهم شارينله ماكمل اسبوع). إلى إشعار آخر ..قهربي الصراحة ..

وفوق هذا كله .. أخوي عزوز يخبرني بأن علي مخالفة رادار ؟؟؟ يارجل .؟؟؟؟ !!

والله يوم شيكت من الموقع .. تبين مخالفة تجاوز السرعة المسموحة 30 كلم ؟؟؟

والله .. مخالفة غبية وما تستاهل .. لا وعليها 600 درهم ؟؟ عنبو شو هالرادار ؟؟

مابتصدقون لو خبرتكم إني دافع فوق 5 ألاف درهم على الرادار من أول ما رجعت لكرسي الدراسة وشي ثاني بعد ما بتصدقونه .. لي 7 شهور مداوم يعني توني فرششش .. أحس فلوسي كلها تروح للرادارات الغبية اللي مادري وين يحطونها .. هذا وأنا امشي عادي يعني طول الوقت متقيد بالسرعة المحددة .. شكله الرادار متحلف علي ما يمسكني إلا يوم شوي ادوس .. ولا انا سواقتي عادية والله  ..

وأعرف واحد عليه مخالفات رادارات .. فوق 15 ألف ؟؟ وهو مسكين راتبه ما يتجاوز 7ونصف .. يعني المخالفة ضعف راتبه ..

عنبو مخالفة وحدة 600 درهم ؟؟

المفروض يراعون رسوم المخالفات في كل إمارة .. فالمعروف أن رواتب الموظفين في الشارقة غير عن رواتب الموظفين في دبي وأبوظبي .. في دبي يستلمون ضعف الشارقة .. وبوظبي 3 أضعاف وانت رايح ..مب حسد ولا غيره .. ولا والله .. الله يزيدهم ويبارك ففلوسهم .. بس القصد لاااااااااااااااازم يراعون الخلق في المخالفااات ..

مايصير ياجماعة واحد راتبه ما يوصل 8 الاف ويدفع للمخالفات 5 او 6 آلاف ..

لا والقهر يوم يحطون لكم رادار متحرك ..

للحين منقهر واخوي الصغير يحليله كل شوي ايي صوبي ازاعج عليه واشرده اختي يتني تهديني ماصار شي ماعليه طلعنا المفتاح .. الخ .. طاااااااااااف ..

الحمدلله اخوي عزوز راح ياب واحد من محلات المفاتيح وسوا حركة وفتح الباب

(يوم شفته قلت هيييه .. شغل حرامية ) حط شي نفس النفاخة بين الباب وبعدين نفخ فيه فسوا مسافة ودخل حديدة ..وماشاء الله خلال 5 دقايق والباب مفتوح ! قلت والله يبالنا نشتري هالأدوات بتفيدنا مع الأيام ..

الحمدلله المفتاح وحصلناه .. بنشوف كم بياخذ عالهالخمس دقايق !!

مالي خلق لحد الصراحة .. احسن حل اني انام  ويمكن الصبح الحالة تكون احسن ..

اشوفكم على خير ..

Share and Enjoy:
  • Facebook
  • Google Bookmarks
  • Live
  • Twitter

7 تعليقات على “معصب ولا حد يقرب صوبي .. !+مخالفات رادارات غبية”

  1. محمد العبدولي أضاف بتاريخ

    ابتسم انت في الشارقة

    الله المستعان

  2. AD* أضاف بتاريخ

    أسأل الله العظيم رب العرش العظيم أن يشفيك..

    “الله المستعان”
    الله يهديكم ويصلح قلوبكمـ

    “أسأل الله تعالى أن يرزقكم الرزق الحلال الطيب المبارك من حيث لا تحتسب …اللهم آمين …”
    الله يعينكم

    حفظكم الله

  3. الفراشــة الطمــوحة أضاف بتاريخ

    بيع السيارة وأشترلك سيكل ما بتحصل مخالفات ^^

    أقتراح جهنمي =)

  4. hajouni أضاف بتاريخ

    الأخ محمد العبدولي ..
    يامرحباً بك ..

    نعم نحن كذلك .. ما أحلاها جملة ^^

    شكراً لك

  5. hajouni أضاف بتاريخ

    AD*
    حياج الله .. وبارك الله فيج ..

    آمين آمين .. ولكِ مثله .. ومثله ومثله .

    يزاج الله خيرا .. شكراً عالدعاوي الحلوة ^__^…
    أسأل الله أن يوفقكم في الدنيا والآخرة .. ويعينكم على ذكره وشكره وحسن عبادته .. آمين ..
    الله يحفظكم ..

  6. hajouni أضاف بتاريخ

    الأخت الفراشة الطموحة .
    حياكِ الله ..
    وكأنني أول مرة أراكِ تكتبين بالعامية .. والله أعلم ..

    لووول .. والله فكرة حلوة فيه فوايد كثيرة .. ومن ضمنها .. رياضة ^^ .. بس المشكلة في الصيف بنحترق وبنصير ( خوال ) ×__×
    بالمناسبة شو سالفة مدونتج ؟ شو المشكلة ؟ أي شي ممكن نساعدج فيها ؟ غيرتِ شي في إعدادات تحويل الدومين ؟ أو هل كنتِ تفكرين بالإنتقال لاستضافة أخرى ؟

    بارك الله فيكم .. ونفع بكم ..

  7. hajouni أضاف بتاريخ

    الأخت الفراشة الطموحة .
    حياكِ الله ..
    وكأنني أول مرة أراكِ تكتبين بالعامية .. والله أعلم ..

    لووول .. والله فكرة حلوة فيه فوايد كثيرة .. ومن ضمنها .. رياضة ^^ .. بس المشكلة في الصيف بنحترق وبنصير ( خوال ) ×__×

    بارك الله فيكم .. ونفع بكم ..

شارك بتعليقك

*
Get Adobe Flash playerPlugin by wpburn.com wordpress themes