عيادات وزارة الصحة في الإمارات إلى أين ؟

قبل شوي راد من عيادة البطينة في الشارقة التابعة لوزارة الصحة في الإمارات هالعيادة الشياب وكبار السن يعرفونه باسم باور هاوس أو باور هوز كما يسمونه وأعتقد يقصدون به

power house

والله أعلم ..

واسمه مركز الشارقة الطبي التابع لوزارة الصحة ..في أبو طينة

المهم أنا اليوم أخذت عهد على نفسي إني ما أدخل أي مشفى أو عيادة حكومية .. إلا وأنا ميت خلاص ..

تخيلوا ياجماعة أنا لي 4 أيام مريض وتعبان .. كحة وبلاعيم وصداع وأحس بتعب كامل بجسمي وحتى صوتي رايح ماقدر أتكلم .. بس الحمدلله قاومت وما رحت لأي عيادة  ..

وأنا من النوع اللي ما أروح المستشفيات بإرادتي .. لا .. أكون مجبور.. تبغون الصراحة ما أروح لها إلا لأخذ إجازة مرضية .وبالفعل أكون مريضاً وقتها (يعني ما اكذب ولا أدعي المرض )واليوم الصبح بعد صلاة الفجر حسيت نفسي ماقدر أداوم فقلت خلاص بكلم مسؤولي وبروح المستشفى وباخذ إجازة مرضية…ما أحب أعود جسدي على الأدوية والكبسولات .

المهم

العيادة هذه اللي ذكرتها لكم صارت لي مع دكاترهم 3 مواقف سيئة واحد مواطن شكله كان يديد ووحدة هندية وواحد من إحدى الجنسيات العربية ..الموقفين الأول والثاني سأسردها لاحقاً إن تيسر..


الموقف الثالث اليوم

رحت العيادة ودخلت على الدكتور إ.ب.ر

شو عندك؟

أنا : كحة وبلاعيم وصداع وأحس إني ما أقدر أركز .. جسمي كله تعبان .. تعب بشكل عام ..

هو : يالس يكتب الأدوية وجذا بعد ما خلص ..وهو يكتب قلت له

أنا : دكتور أنا عندي قولون عصبي وفي فحص عيادة الناصرية التابعة للبلدية الدكتور هناك فحص معدتي واستغرب يقول سويت عملية أو شي جذا ؟ قلت له لاماسويت أي عملية.

فياليت لو تقدر تفحص ..

الدكتور : لا ماعليك منهم أنت شاب ومافيك شي

أنا : O_o..ومشيت الموضوع .. (علماً بأنني مريض بالقولون من الصغر )

وجان يسألني : وين تشتغل قلت له موظف في بلدية الشارقة

أنا :انزين دكتور بغيت إجازة

هو : @_@(يطالعني بنظرات )ليش تبغي إجازة؟( ليش يعني؟ عسب أحطيها في جيبي؟..مريض بعد ليش يعني ؟ ) خلاص روح إييب ورقة الإجازة ..

أنا من وين يا دكتور ؟

هو : من الكاونتر

بعد ما دفعت خمسين درهم ورجعت له بالورقة ويالس يكتب ..

أنا : دكتور حط لي يومين انزين .. اليوم وباجر ..

هو : ليش ؟@_@ أنت شاب ومافيك شي ؟؟؟

أنا : دكتور المرض ما يعرف شاب ولا شيبة ؟

هو : أنا بعطيك إجازة اليوم بس لأنك مريت علي

أنا : انزين وأنا تعبان وباجر بعد يمكن ما أشفى ..

هو : كلنا تعبانين ..

أنا : $_$ انزين دكتور أنا تعبان وومريض وماقدر أركز صداع وبلاعيم وجسمي …

هو : مافيك شي ..

أنا : يعني شو أنا أكذب عليك ؟

هو : نحن دكاترة .. وعلمياً مافيك شي .. لا حرارة ولا احتقان ولاشي أنا بس بعطيك إجازة اليوم لأنك مريت علينا ..

أنا : @_@ ضغطي ارتفع 100 درجة .. وتميت ساكت ..والله كنت برد عليه برد ما يعجبه .. بس فضلت الصمت واحتسب الأجر عند الله .. هذه تهمة كبيرة ترا .. مافيك شي .. الحمدلله عمري ما كذبت والحين ياي هذا يسمي نفسه طبيب ويتهمني بالكذب ..

كتب لي إجازة لمدة يوم واحد (اليوم يعني) ..قلت له مشكور وطلعت ..

على فكرة هالدكتور أخوي موصني عليه روح له أوكي وجذا لأن أخوي دايم يتعامل مع الدكاترة  ويعرفهم كلهم بخصوص وظيفته ..وكنت عادي أتصل به واقول له كلم الدكتور او اقول للدكتور انا أخ فلان الفلاني وبيمشيني..بس انا ماحب الواسطات وأبغي أشوف الناس على حقيقتهم..

الصراحة ألف علامة تعجب واستغراب على تعامل الأطباء في هذه العيادة مع المرضى .. حتى المرة الأولى يوم رحت هناك بسبب مرض والقولون العصبي اللي أعاني منه .. كانت دكتورة هندية وماتعرف ترمس عربي .. حاولت أفهمها بالإنجليزي .. بس راسها ياااابس .. وردها كان نفس رد الدكتور السابق ..

أونه أنت شاب ومافيك شي ..!!

سبحان الله .. يعني الشاب ما يمرض ؟؟؟

الصراحة لا أسلوب ولا احترام لمشاعر المريض ولا حتى تعامل نفس الناس ….صدق ياجماعة ثالث موقف يصير لي من نفس أطباء العيادة وأنا من عادتي ما أروح المستشفيات أوالعيادات إلا لشيء ضروري  يحسسونني بأنني اكذب عليهم وأدعي المرض؟..

أنا أرضى بكل شيء إلا أن يتم اتهامي بشيء ليس فيني ..

فاليوم أقولها

لو هذا حال أطباء وزارة الصحة وعياداتها .. والله الواحد يجلس في بيته ويتعافى طبيعياً ويتحمل على المرض ويصبر خيراً من أن يذل نفسه عند طبيب مايحترم المريض لأنه شافه شاااب ..

شي يقهر الصراحة .. شاب ومافيك شي .. انت طبيب ياخي تكلم بالعقل والمنطق .. الشاب ما يمرض؟؟؟؟ حدث العاقل بما يعقل ..( إلا إن كان المتحدث غير عاقل فذاك أمر آخر).. مادري بأي أساس يختارون الأطباء في مستشفياتنا وعياداتنا ؟

أنا أخوي(عمره 14) اللي ما يخصه في الطب ولا يعرفه .. شافني ليلة البارحة وقال لي شو فيك ؟ ليش جي شكلك مريض .. شاف وجهي وعرف .. والدكتور بعد الفحص والسؤال والجواب .. قال بكل صراحة مافيك شي .. ياسلاااام ؟؟؟

أنا اليوم أقول وبخبر  هلي .. ما بدخل أي مستشفى أو عيادة حكومية إلا وأنا ميت أو إذا صار شي وأنا مب في وعيي ومجبور ..

وإذا فيني أي شي بييلس في البيت وبتعافى وبتحامل على نفسي .. وسلموا لي على الدكاترة إللي ماعندهم سالفة ..

كان ودي أعرف هل بإمكاننا رفع شكوى على طبيب ما لأنه لا يحترم مرضاه ؟

 مادري أتوقع لو كنا في دولة أجنبية كان الأمر عادي وميسر أما هنا ..

فعلى وزارة الصحة السلام ..


Share and Enjoy:
  • Facebook
  • Google Bookmarks
  • Live
  • Twitter

10 تعليقات على “عيادات وزارة الصحة في الإمارات إلى أين ؟”

  1. Phantom Kid أضاف بتاريخ

    مرحبا يا بطل ,….

    ههههههه … لو كنت مكانك شان خليته يطلع لي اسبوع… جيه على الفاضي تدفع خمسين.؟؟!!

    انا ما أؤمن بشي إسمه ورقة إجازة … لو تعبان اسحب إجازة على كيفي … و خلهم يولون …

    بس حلوة هذي ” الباور هاوس ” …

    ما تشوف شر يا بطل … و أجر و عافية …

  2. desires أضاف بتاريخ

    السلام عليكم ، الصراحة يحزني وايد ان صار فيك هالشي ومن خلال تجربتي وتعاملي مع بعض دكاترة العيادات الصحية ، ترى أقولك انك ارتكبت اكبر غلطة يوم رحت هناك ، لأنهم فعلا مايطبقون شي من أساسيات الطب والتعامل مع المريض ، أنا اتكلم عن اللي تعاملت معاهم من دكاترة العيادات الحكومية وما أعمم كلامي أبدا .
    انا ابدا ماكنت اروح اتعالج في عيادات ومستشفيات حكومية نظرا لسمعتهم السيئة ، لكن من بديت ادرس طب بديت كله اروح مستشفيات وعيادات حكومية نظرا لاحتكاكي ببعض أطباءهم وعشان احكم واشوف بعيني سبب السمعة السيئة للأطباء والعلاج في بلادنا .

    بالنسبة لعيادة باور هاوس من فترة استوالي موقف وياهم كنت مريضة ب (طفح جلدي) وكان ويكند رحت للأجرب عيادة حكومية من بيتنا المهم عطتني الدكتورة دوا وقالت ضرووووري اذا ماخفت الاعراض باجر تسيرين تسوين فحص دم في عيادة باور هاوس لانها الوحيدة المفتوحة بالجمعة ، المهم اليوم الثاني رحت اسوي دم وطلعت النتيجة يلست بروحي اقرى النتايج وانتبهت ان في شي اسمه ESR مرتفع عندي وبشكل جدا عالي مما يعني ان عندي التهاب ، طبعا رحت عند الدكتورة وعطيتها الورقه وقالت كل شي طبيعي الحمدلله ، أنا حزتها بطلت عيني وقلتلها وال ESR ، قالت لي لا ماتبصيش عليه انتي بس شوفي عدد كريات الدم البيضا والحمرا ، وأنا وحليلي مثل الهبلة صدقتها وقلت هي دكتورة وكبيرة أكيد عندها خبرة أكثر عني وأكيد هالارتفاع مايخصه في مشاكل الجلد ، وطبعا هي شكت من اسلوب كلامي اني ادرس طب ويلست تسولف وياي وقالت لامافيج شي وان شاء الله كل شي بيخف .

    المهم قلت يلا بنصبر ومع الايام بيخف يمكن ، لكن الطفح الجلدي بدى ينتشر في جسمي يوم عن يوم ولمدة اسبوعين وانا كل يوم اقول اليوم بيخف لين مازاد وايد وعقبها قررت اروح القاسمي عند دكتورة جلدية ، ورحت والدكتورة كانت اماراتية ماشاء الله عليها قمة في الاخلاق وقمة في التعامل ، المهم طلبت فحص دم لانها شكت ان عندي التهاب في الدم وعطتني بعض الادوية ، خذت الادوية وبعد فترة رحت اسوي فحص الدم ، وكان ESR نازل مما يدل ان الالتهاب خف والحمدلله شفيت . يعني لو مشيت على كلام هاييج الدكتورة الله يستر مادري وين كان بيوصل الالتهاب ، لكن الحمدلله ، حتى الدكتورة الثانية بروحها قالت لي ان ESR جدا مهم في مثل هالاشياء . بس ماعرف هاييج كيف قالت ماتبصيش عليه .

    الموقف الثاني ، من فترة انا والأهل كلنا شي واليوم الثاني تكرم كلنا اسهال وزواع وحمى فأنا قررت كالعادة العيادة اللي حذال بيتنا في حين قرر البقية يروحون لعيادات خاصة دخلت عند الكتورة ، قالت لي شو فيج قلتلها فيني كذا وكذ وكذا ، وعلى طول مسكت القلم ويلست تكتب لي الدوا وقالت اكيد انفلونزا الخنازير ، عاد انا انصدمت ويييييين اللي علومنا ان نطلع عيون المريض من كثر الأسئلة بس عشان نوصل للمرض اللي فيه “و هذا الصح” ،وان من اكبر الاخطاء ان الدكتور يشخص حالة مريض من سؤال واحد .
    يعني شي بديهي جدا اذا ياك اي حد بهاي الأعراض تسأله شو ماكل على الاقل ؟ او اذا حد في البيت بنفس الاعراض ؟
    حتى الانسان العادي لو خبرته بهاي الاعراض بيسألك هاي الاسئلة ولو كان مايخصه في الطب .

    فأنا قلتلها دكتورة تتوقعين هاي الأعراض الها خص بشي ماكلتنه ، قالت لا ، انا : !!!!!!!!! ، قلتلها امبلا وخبرتها القصة ، بعدين قالت لي ، هيه في مثل هالحالة ممكن الاكل له خص في الأعراض .
    المهم بعدين طلع عدنا تسمم غذائي .
    وهالموقف عمري مابنساه ، انا في حياتي ما مر عليه دكتور شخص حالة مريض من سؤال واحد ،
    لو انا ماكنت ادرس طب ومانبهتها بسالفة الاكل ، او ماقدرت اربط او استنتج ان الاكل له خص بالموضوع كانوا بيعالجوني عساس عندي انفلونزا الخنازير ..

    فعلا دكاترة العيادات الحكومية ، ابدا الواحد مايثق فيهم .. وهذا حسب تعاملي وياهم .

    اسمحلي طولت بس فعلا الوضع يقهر ويرفع الضغط

  3. لا للمخدرات أضاف بتاريخ

    يمكن انت صح ويمكن هو صح ؟

    يمكن هالدكتور يقابل باليوم اكثر من حالة

    منهم المريض ومنهم اللي يبا اجازة

    ولو بيعطي اي مريض اجازة اكثر من يوم يمكن يتحاسب

    يمكن كان يفكر بهالطريقه

    يمكن تصادف 2

    شاكي و مشكو في حقة

    الشاكي يقولك كلام عن المشكو في حقة !

    لدرجة انك بتقول هل معقولة في ناس مافيها ذرة من البشر

    تسمع كلام المشكو في حقة كل شي ينعكس خخخخخخ

    وتتكرر هالحاله كل يوم

    يعني شغلته علمته مايثق بحد

    يعني اعذرة

    ويمكن كان قاصد

    وانا ماقدر احكم لووووووول

    بس صراحه شفتك وتستاهل اجازة يومين

    MjM

  4. hajouni أضاف بتاريخ

    Phantom Kid .. العزيز

    أهلا وسهلا .. مليون مرحبا ..ياخوي المسألة مش مسألة بيزات ولا خمسين درهم .. ياخي الموضوع كله .. معاملة وأسلوب .. يعني لو قال لي بأسلوب محترم أنا ماقدر أعطيك .. عادي .. بس أن يتهمني بشي أنا مافيني (الكذب) انا هنا عاد أطنقر ..

    بخصوص الدراسة ورقة الإجازة ما اعطيهم طاااااااف .. بس المشكلة في الدوام ياطويل العمر .. يخصمون من الراتب .. وعادي يخصمون راتب يومين أو ثلاث .. والحياة بخير !!
    عسب جذا قلت نلحق وناخذ الإجازة ..

    باور هاوس .. تعرف بعد شيابنا أول ^_^

    الشر ما يييك ياخوي .. والله يعافيك ويسلمك ويحفظك من كل سوء ..آمين ..

  5. hajouni أضاف بتاريخ

    MJM .. الحبيب

    أنا هنا مب إني أشتكي على الطبيب أو أقول أني أنا الصح أو هو .. المشكلة بكبرها .. شو يقصد ب ” علمياً مافيك شي ” ؟؟؟ يعني أنا أكذب عليه ؟

    وتعرف هذا اتهام بحقي .. تتوقع عادي أرفع عليه قضية ؟

    أنا معك وكلامك عين العقل .. لكن هل قرأت كلام الأخت ديزايرز فوووق ؟أنا توقعت هالأمور بس تصير لي أنا .. بس طلع .. ياغافل لك الله .. الله المستعان ..
    والمشكلة الثانية .. صدقني أنا لو مخبر أخوي .. الدكتور بيعطيني إجازة يومين وهو فرحان .. ليش؟ لأنه عندي واسطة .. سبحان الله حتى الطب يباله واسطة شفت كيف يا أم جي أم ؟؟
    الإجازة ما تهمني والله .. كثر ما يهمني أسلوب ومعاملة الناس لي .. يعني أشكره إنسان (مابغي أمدح نفسي ) جدامك .. وتتهمني بالجذب عيني عينك ؟؟؟
    مانقول غير الله المستعان ..

  6. hajouni أضاف بتاريخ

    الأخت .. Desires ..
    وعليكم السلام ورحمة الله وبركاته ..

    مابخفي عليج إني كنت أتريا ردج .. وتوقعتج بتدافعين عنهم لأنه بمجالكم ويوم من الأيام بتكونين طبيبة .. الله يوفقج ..

    الله المستعان .. الموقف الأول الصراحة ..لازال السؤال قائماً .. بأي أساس يختارون الأطباء في مستشفياتنا وعياداتنا ؟

    سبحان الله طفح جلدي .. وإلتهاب .. والطبيبة ؟؟ مليون علامة استعجاب الصراحة ..
    أسأل الله أن يشفيج .. طهور إن شاء الله .. وأجر وعافية ..

    الموقف الثاني .. أنفلونزا الخنازيييييييير ؟؟؟؟؟؟؟؟؟ الــــلـــه ×__×

    هنا المشكلة .. الطبيب ما يسأل شوفيك ولا يطلع روحك ولا شي .. إن كثر خيره يسألك سؤالين .. أو سؤال واحد يكرره مرتين .. وبسسس ..

    أنا أحيد بعد المفروض الطبيب يسأل ويسأل ويسأل عسب يشخص الحالة وبعدها يكتب الأدوية ..

    هالطبيبة يبالها شكوى أو حد يهزبها الصراحة .. وأحلى شي يوم الطبيب يسوي عمره فاهم وهو من هناك ولا شي .. يعني صدق والله الأعراض اللي ذكرتيها أكيد أول ما يطري على بال أي واحد عامي .. بيقول لك ماكل شي ..

    الحمدلله .. الله ستر .. .وصدقتِ ماينوثق فيهم الصراحة .. وأنا حرمت نفسي خلااااااص . ..

    بالحل أختي .. بالعكس استفدت من الموقفين .. إني أنا مع الأيام الياية أعلم إخواني وربعي وأقول لهم أنتوا طلعوا عيوووووووون الطبيب وقولوا له فيني جذا وجذا وجذا .. لا تسكت أبد .. لو هو ما سأل أنت خبره وعلمه .. وشي ثاني مب كل طبيب فاهم .. وهذا بحطيه في بالي على طووووووووول ..

    شكراً لج ..

  7. عواشي أضاف بتاريخ

    السلاااام عليك ورحمة الله وبركاته اخويه حاجوني ..

    اشحااااااااااااااااالك الحين ان شاء الله احسن ^_^ ماتشوف شر يارب و اجر و عافية بابا ^_^..

    تبي الصراحة موتني من الضحك قعدت ساعه اضحك هههههههههه …

    وااايد تتحرطم تراك لوول ..

    انزين الريال ماقال انك جذاب جيه كاش بس كان يلمح لك انك تبالغ شوي لوووول ….

    انا ما اادافع عنه بس صج يحليلهم في اليوم اييهم ألف مريض و كلهم نفس العله زجام و حمة و بلاعيم .. و كلهم يقولون نفس الكلام ف هم اونهم خلاص لاتتكلمون نعرف شو فيكم من اول نظرة لوول ..

    ماعليه بابا كل الدكاترة في مستشفياتنا الحكومية و الخاصة بعد كلهم نفس الدقه يعني نفس الطينه .. الله يعينا بس ..

    نعرف واحد كان مرقد في المشتشفى بسبب الحمى لانها ما كانت تخف عنه تخيل و في مشتشفى خاص من ارقى المستشفيات اونه .. تخيل عقب ستين فحص قالوله فيك حمى من غير سبب !!!!!!!!!!!!!!!!!!!!!!1

    و عقب ما سافر برع اكتشف من اول فحص انه فيه سرطان .. والحمدلله تعالج..

    و ريلي كان يعاني من الم في معدته و من فترة طويلة تخيل ما سووله اي فحص بس يعطونه ادويه و قالوله فيك قولون عصبي .. لين ما قلتله غريبة ما سوولك فحص لشي او ما سألوك شو تاكل و شو تشرب !!

    انا اللي موووول ما يخصني في الطب قلتله اكيد فيك التهاب في البول و طلع صح لوول .. (( يبالي احول من مهندسة لطبيبة طبعا بالخبره لوول ))

    يالله ياخوي ربي يحفظك و يبعد عنك و عنا السووو ..

  8. سمو الأميرهـ أضاف بتاريخ

    أجر وعافيه أخوي .. ما تجوف شر ..

    اممم
    فعلا ها حال المستشفيات والعيادات الحكومية
    ييك راي ..سو مثلي وسير عياده خاصة ..
    صح انه بيدفعونك .. بس ع الأقل ما بيطلعوك كذاب و يفترون عليك ويحسسوك إنه ما فيك شي ..

    بس ما أخفي عليك حتى العيادات الخاصة فيها عيوب..
    امم في دكتورة هندية في عياده خاصة دوم أسير عندها لما أوصل لحاله حرجة لاني ما أحب المستشفيات
    و في مره قلت لها : دكتوره أنا فيني ضيق تنفس وحساسية ..
    هي : انزين حطي لج أكسجين ..
    أنا : أنزين ما شي حل غير الأكسجين .. وأنا دايما اتعب يعني ع الدقه أحط أكسجين
    هي : لو تبين إتريي يوم بسيير الهند وبييب لج من هناك دوا ..
    أنا : @_@
    ما حبيت أرمسها وايد لأني وقتها كنت تعباانه الصراحه 😐

    أشك إنهم دارسين طب 😐

    **********

    والله المستـــعـــآن
    اسمحلي أخوي ع الإطاله
    بس الحل نستوي أحن دكاتره ونعالج روحنا
    تحياتي

  9. hajouni أضاف بتاريخ

    الأخت عواشي

    وعليكم السلام ورحمة الله وبركاته

    كأني شفت هالاسم مكان
    O_o??

    حياج الله ..
    الحمدلله الحين بخير بس يوم علقتِ كنت نص نص

    الشر ما ييكم .. يزاج الله خير ..

    لووول وايد اتحرطم XD
    هيييهاااااااااااااااااااااااااااااااااا .. لا أشكره بعد عيني عينك .. نحن أطباء ونعرف شغلتنا وعلمياً مافيك شي
    ×__×
    يعني انت واحد خريط وجذاب -__-

    حمى بدوون سببب؟؟؟؟؟ عجيببب !!!سبحان الله وطلع فيه سرطان ؟؟ الله يشافيه يارب ..
    بس صدق صدق .. يعني لازم نسافر برع البلاد ونخسر بيزاتنا بس عسب نعرف شو العلة ؟؟ عيل شو خانة الدخاترة عندنا ؟؟؟ صدقيني مانبغي علاج منهم .. بس نبغي نعرف العلة من شو ومن وين .. وبروحنا بنتعالج ..

    الله يحفظ ريلج … يحليله .. لا يكون كان يأكل أدوية القولون ×_×
    خايف نفس الحالة معي الله يستر بس -__-
    قالوا لي فيك قولون .. وانا اصلا لابسنهم ما اخذ ادويتهم .. صح أن مرات أعاني بشدة .. بس الحمدلله . ولا أعود جسمي على هالمخدرات ..
    والحمدلله أحسن من غيري الكثير من المرضى ..

    ماعليه يبالج تدرسين طب ^^ والخبرة يلعب دور طبعاً ..

    الله يوفقكما وينور طريقكما ويحفظكما بحفظه ..ويبعد عنا وعنكم السوء والأسقام ..آمين ..
    شكراً

  10. hajouni أضاف بتاريخ

    الأخت سمو الأميرهـ
    حياج الله أختي .. والله يعافيج .. الشر ما ييج ..

    الحال من بعضه .. لا الحكومية ولا الخاصة .. بس أتوقع في بعض من الخاص على الأقل تضمنين .. ولو أننا سمعنا حالات كثيرة لعمليات بسيطة ونتج عن إهمال طبي وتوفى المريض .. وكأنهم يتدربون الطب علينا نحن .. فيران تجارب ..حاشاكم ..

    الله يعينج أختي ويشفيج من مرضج .. صح الحل نحن نعالج أنفسنا .. بس بعد خلنا نعرف شو المرض أول ؟
    تدرين انا في حالتي ( القولون ) بروحي كنت أبحث في المواقع الأجنبية والعربية .. وكنت أشوف تجارب المرضى وكيف يتعالجون من المرض ؟ لأن أغلب الأدوية ما كانت تفيدهم أو تسبب لهم أعراض مستقبلاً ..

    أنصحج تسوين بحث عالحفيف في قوقل عن أسباب ضيق التنفس والتعب .. ولو بالإنلجيزي .. صح بتتعبين شوي .. بس عالاقل تعرفين شو فيج بالضبط وكيف تعالجين عمرج .. الله يشفيج وطهور إن شاء الله ..

    مسموحة وبالحل أختي ..
    في حفظ الله ..

شارك بتعليقك

*
Get Adobe Flash playerPlugin by wpburn.com wordpress themes