بسم الله الرحمن الرحيم ..

قبل شوي  وبعد صلاة الجمعة مباشرة

أخوي الصغير ينتظرني في السيارة .. فتحت الباب ودخلت ..

هيه والله صدق المكيف ما يبرد !!

رجعت بالسيارة للوراء حتى أتمكن من الخروج من موقف السيارات ( الموقف عبارة عن مساحة خالية لكنها ممتلئة بالرمال )ا

رجعت للخلف قليلاً وعدلت “السِكّان “وتقدمت للأمام وأنا أتقدم شعرت أن  سيارتي تنحني للسيارة التي أمامي و|جان ادوس ريس كامل | حسيت أني بدعمه فوقفت وقلت خلنا نرجع رويس ..

حاولت أرجع ..أشوف الموتر “جيم” وعلق وما يتحرك من مكانه .. طيب نحاول من يديد . حاولت اتقدم للأمام .. ما نفع .. ارجع للخلف .. ما نفع ..والشباب والأطفال يطالعوننا . (الحين عرفت ليش الناس تصر تركب مخفي ، علماً إن سيارتي ما بها مخفي أبد ) نزلت من السيارة <<مسوي عمره خبير ويتأكد من المشكلة .

الرمل ما كان كثيف .. وكنت أقدر أطلع السيارة بس للأسف ما عرفت أتصرف صح ..>> أول مرة يغرز

وأنا أحاول أطلع السيارة أشوف واحد يمشي ويضرب سيارتي من ورا .. ماسمعته شو قال .. نزلت وأشوف اثنين من الأخوة جايين معه .. صاروا 3 ..واحد منهم (مطوع) جاء نحوي وقال لي نحن سندفع السيارة وأنت ارجع للوراء .. بس لا تدوس ريس ..

أنا : تعال جرب >> استجابة سريعة لأني اعرف مامني فايدة في هالموقف

جلس الأخ في السيارة وحاول .. للأمام .. للخلف .. للأمام للخلف

وأحد الأخوة يصر عليه قوموا ندفع السيارة ماله إلا الدفع ..

الأخ الثاني : عمي مايحتاي دز بيطلع ماعليه ..

وبعد فترة جاء شخص رابع وقال فلندفع السيارة معاً

ونحن ندفع السيارة شفت أطفال وناس متجمعين >> شسالفة من وين طلعوا ؟ الله أعلم

خلال عملية الدفع شعرت بحرارة “البونيت” وحرقت يديّ .. ولازلت أشعر بالألم بعد مضي ساعة ونصف عالموقف !! وأنا الآن أقول في نفسي .. جزاهم الله خيراً بالفعل .. أتوقع الكل تألم من هالحرارة ومع ذلك دفعوا السيارة وما اهتموا لأيديهم..

طلعنا السيارة .. وسلمت على الأخوة ..

يزاكم الله خير .. مشكورين والله ما قصرتوا .. >>وشوي ويهي يصير طماط<< بس ما صار الحمدلله

وبعد ما طلعنا السيارة مباشرة شاهدت واحد من الربع

هو : ها ليسن واسطة ؟

أنا : @___@

وسلمت على الأخ اللي كان يطلع السيارة ..

يزاك الله خير .. مشكور والله

هو : حياك الله .. ما يباله بس إنك ترجع للوراء وتتقدم .. وبيطلع ..شكرته .. وطلعت

وأنا ماشي أحس ان السيارة فيها شيء .. ماتمشي عدل ..

اخبر اخوي الصغير ..

أحس الموتر فيه شي

هو : شو فيه ؟

مادري بس أحس فيه شي ..لحظة بس نوقف وبنشيك

هو : خلنا نروح البيت أول >> مستعيل الأخ

وأنا اتفحص الأمر .. عرفت أنني لم أرفع ال

|handbreak|

رفعته وضحكت على تفسي .

أخوي : شفيك ، ليش تضحك ..

ماشي بس جذا ..

وصلت البيت ولا أشوف ربيعي اللي علق عليّ .. يقول لي هييلا ربعك ولا كانوا وياك ؟ يقصد الأخوة الذين ساعدوني على إخراج السيارة ..

قلت له : لا

قال لي : عيل آسف لأني قلت ليسن واسطة جدامهم ظنيتهم يعرفونك ولا ربعك..

أنا : لا والله مب ربعي وماعرفهم .. بس يزاهم الله خير شافوني مغرز وساعدوني ..

هو :   لا تاخذ بخاطرك كنت اتسولف وياك ..

انا : لا عادي ياريال >> من كثر ما تعود

وتوتة بطوطة هنا تنتهي الحتوتة ..

أسباب التغريزة :

أظن والله أعلم أنه بسبب االفقرة الأخيرة من تدوينة حادثين مؤكدين خلال دقيقتين!!

فوائد وعبر :

1. لا تعيب على الآخرين لكي لا تبتلى بما هم فيه
2. وانت طالع من موقف للسيارات تفحص كل الاتجاهات بما فيها اتجاهي الشمال والجنوب !!
3. أن حصل و ” غرزت ” وما عرفت تتصرف .. |خلك| جالس في السيارة وحرك السيارة ببطء للخلف وللأمام ..تذكر ببطء شديد حتى تتمكن من إخراج السيارة .. أما إن |دست الريس| فالإطارات تغوص في الرمال ويصعب استخراجها إلا بمساعدة خارجية …

التصنيف: شخصية

2 تعليقات على “وجـــان نغرز @__@”

1. desires أضاف بتاريخ May 3rd, 2009 الساعة 3:54 am -

   هههه عيبتني القصة .. يزاهم الله خير ماقصروا الشباب ..

   وأحلى مافي الموضوع الدروس والعبر في الأخييييير ..

2. hajouni أضاف بتاريخ May 10th, 2009 الساعة 3:36 pm -

   الأخت دزايرز ..

   حياج الله

   يزاهم الله كل خير .. وبارك الله فيكم عالمرور والتعليق .. شكراً

   ^_^

شارك بتعليقك

إسمك (خانة مطلوبة)

بريدك الإلكتروني (لن يتم نشره) (خانة مطلوبة)

موقعك الشخصي

CAPTCHA Code *