03.18حادثين مؤكدين خلال دقيقتين !!
بسم الله الرحمن الرحيم
الوالدة تدرس في مدرسة لتعليم الكبار (مسائي طبعاً ) فهاليومين أنا اللي كنت آخذها واييبها البيت .. واليوم كنت شوي تعبان ومالي خلق لشي الصراحة رحت للمدرسة عادي .. وفي طريق العودة كنت بدعم مرتين ..
الساعة : 7:55 م
المرة الأولى : (جنب نادي الشعب ، يوتيرن قبل الجمعية )ا
كنت خلف السيارة مباشرة وماحطيت مسافة أمان كافية وشوي قلت خلنا نتجاوزه ما منه فايدة .. أشرت لليمين ولفيت وشوي اشوفه يلف علي ّ مرة وحدة وبدون ما يدق إشارة (على أساس يجاوز السيارات التي أمامه) .. .. الحمدلله خفيت السرعة ( وأنا بس عصبت شوي >> شوي مب وايد وما هرنت عليه يحليلي )ا
المرة الثانية :( بعد مخبز علي غلوم وأولاده قبل اللفة )ا
بعده بأقل من دقيقة وبنفس الطريقة كنت ملاصق بالسيارة ومب محطي مسافة أمان كافية .. وشوي ولا أشوفه يأشر يبغي يلف يمين وعلى ينبه (الشارع اليمين) سيارة أخرى فهو ينتظر السيارة تمر عسب يمر والدخلة جريبة منه ويخفف السرعة شوي شوي وأنا بعدني ملتصق ومزيّد السرعة .. وشوي يرص بريك وأنا أجص بريك قوووووووووي .. الوالدة الله يحفظها شوي تحركت وحاولت أمسكها بس الحمدلله ماصار شي .. وبعدهاعرفت أنها مب رابطة حزام الأمان ..
والحمدلله .. الله ستر ..وطلعنا منها سالمين
فوائد وعبر ..
- اترك مسافة أمان كافية بينك وبين السيارة التي أمامك .. ولا تستعجل
- انتبه للإشارات الضوئية في السيارات .. ولا تستعجل
- يوم يكون حد وياك .. لا تستعجل ..
- انصح الراكب معك ربط حزام الأمان .. ولو ما رضى اجبره لو تطلب الأمر
وقفات مع النفس
يمكن لأني دايماً أقود السيارة لوحدي فلا أشعر بالخوف ومتعود على السرعة ( شويتين ) ، ولو إنني أراها مناسبة لي وليست بذاك الزود لكنني اقتنعت الآن بضرورة الأخذ بآراء الآخرين عني وعن “سواقتي “ا
ولازم أعلم نفسي لو ركبت حد وياك تعود على القيادة بالسرعات المسموحة لك وبالذات في المدينة والفرجان حيث ” يطلع ” اليهال ” والخرفان ” من حيث لا تشعر..
أتوقع الموقف الأول ما كانت غلطتي .. أما الثاني فـ100% أنا الغلطان ولو المفروض السائق ياخذ الشارع اللي يبغي يلف فيه .. مب يلف من سيد اليسار لليمين عسب يروح للدخلة ويعطل الخلق اللي وراه ..
علماً بأنه حتى الآن ولله الحمد لم أصطدم بأحد إلا شحفة بسيطة يوم الجمعة ونحن طالعين من مسجد الأرقم بن أبي الأرقم في النخيلات -أول أيام لقسز-Lexus- الكاكاوي- وأنا راد – ريوس (للخلف) وما انتبهت جان اسمع صوت ولا من الارتباك ماعرفت بالذات كان شعري شوي طويل ومتبهدل ولأني فريت العصامة من الحر .. ويوم وقفت ماعرفت اتعصم ولا انزل.. وانشغلت بالعصامة طرشت ربيعي وتفاهم مع الريال نزل وتفاهم ورد..
أنا : ها خير ؟
.. هو : ما شي ماصار شي
أنا : الحمدلله
هو : تعرف كان منو ؟؟
أنا : لا ، منو ؟؟؟
هو : الشيخ عبدالله الحمادي
أنا : @________________@
.. للي مايعرف الشيخ عبدالله الحمادي هو واعظ في الشؤون الإسلامية والأوقاف في الشارقة وكان حاضر خطبة الشيخ محمد بن غيث الغيث ذاك اليوم
والحمدلله ما تعتبر دعمة ولا حادث ولا حتى شحفة لأنه ما صار شيء أبد
عكس بعض الناس اللي ما خلوا موتر إلا شحفوه وشلوه وبالذات اللــقـــســـزات -___-
>> طريقة حلوة للدعاية عن الموقع ^^
السلام عليكم
موووول ماقطعتني هههه…
وبعدين أنا اعرف اسوق انزين صح بالبدايه دعمت وكسرت السيايير بس تعلمت هههه
السيايير أول مايشوفوني يايه يخوزون عن دربي هههه يحليلي والله
نصايحك مفيده وان شاء الله انت تطبقها بالأول ^_*
وهالله هالله بالوالده
تحياتي
[...] عواشي on حادثين مؤكدين خلال دقيقتين !!hajouni on أسبوع إجازة .. مهمة وأهداف !!محمد الهاشمي on أسبوع [...]
وعليكم السلام ورحمة الله وبركاته ..
الأخت عـواشـي
لووووووول .. مب قصدي تقطيع >> شو شايفيني شيف وانا مادري ×_×
هذه بروحها كم تسوى >> الناس تخاف مني وتفتح لي الدرب .. << فكرة حلوة ^_^
هـــيه ,, الله يعيننا .. إن شاء الله نحاول نخف من السرعة ونسوق شرات الخلق
شكراً عالمرور .. ونتريا تدوينتج القادمة ..