07.24مــطـــوع وتـــرقـــم بـــنــــات ؟!!!
بسم الله الرحمن الرحيم
الافتتاح الرسمي للمدونة مع قصة حدثت ليلة البارحة
أمس بعد صلاة العشاء وأنا طالع من المسجد أمشي وثلاثة من ربعي راكبين السيارة كنا نتسولف عالسريع لأنهم في الموتر وأنا أمشي.. المهم.. ولا شفنا موتر وقف نزل الجامة
وواحد من الأخوة -الله يهديه – من اليالسين في السيارة .. أول ما شاف السيارة واللي فيها أظن والله اعلم رقمهم ( من الترقيم) ^^” .. السيارة فيها حرمتين المهم شافوني وقفوا والأخت اليالسة عاليمين غطت شعرها وتعدلت.. والشباب اللي في الموتر كانوا رايحين في دربهم على راحتهم .
الأخت : السلام عليكم .
أنا : وعليكم السلام ورحمة الله ..
الأخ في الخلفية -المعلق- : مطوع وتكلم بنات ؟ ترقمها ؟ !!>> طبعاً وهو يصارخ ويزاعج ..
الأخت : أخوي وين مسجد خالد بن الوليد ؟
أنا : خالد بن الوليد هممم ( وأنا كل بالي عالكلام اللي ينقال في الخلفية من الأخ ومستحي وحالتي حالة .. (
أنا : أختي شوفي الشارع كملي سيده لين .. وأنتوا رايحين بتشوفون المسجد جدامكم..
المعلق : كان يصارخ وبصوت عالي تغازل ومادري شو .. أظن والله أعلم البنتين في السيارة ما سمعوه بس اللي برع يسمعونه.
الأخت : وين يعني ندخل الفريج ؟
أنا : أختي كملي سيده وبتشوفين المسجد جدامكم ..
والله يا شباب ما قدر أوصف لهم الطريج والسبة اللي كان يعلق الله يهديه .. يعني الحين وحدة مضيعة وتبغي تندل الدرب وأنا أدليهم يعني لازم أتغزل فيهن ولا أرقمهن ؟؟؟؟؟
والدرب ادله واعرفه بس من التعليقات مخي افتر وماقدرت ادليهم..
المهم روحوا عني وشكلهم ماعرفوا الطريج .. اتصلت في الأخ المعلق
أنا : ياخي الله يهديك شوهالكلام اللي تقوله ؟
المعلق-وهو ميت ضحك- : هيه عيل ليش يوقفونك ويكلمونك ؟ ولما شافوك ليش ما عدلت عبايتها
أنا : لا والله أول ما شافتني عدلت عبايتهاوغطت شعرها ..
المعلق : لا ماعليك منهن أنا أعرف بنات (وذكر اسم فريجنا )
أنا : الله يهديك ..
وهني تخلص السالفة .. بس سؤال تبادر إلى ذهني : يعني لو الحين واحد أجنبي -أمريكي أو بريطاني أو حتى سيخي هندوسي كافر متكفر – وقف وسألني عن مكان عسب أدله .. هل هذ ا يدل على إني أحبه أو أتغزل فيه ؟ ولو أي إمرأة وقفت تسترشدني الطريق وأخبرتها يدل على إني إغازلها وأرقمها ؟؟؟ الحمدلله على نعمة العقل .. .!! الضايع أي كان لو طلب مني لازم أدله ولو ماعرفت أحاول أساعده أو أعتذر له .. أما أن أتركه بسبب تعليقات فلان وعلان وخوفاً من كلام الناس فهذا لم ولن أفعله بإذن الله ..
وكل يوم تعالوا
مطوع اصلي
الصراحة تعجبني
ماشاء الله عليك
مستوي مرشد مال الاوقاف
خخخخخخخخخخ
هلا والله أخوي وربيعي بو حمــــــــــــــــــــــــــــــاد …
نورت الموقع بكبره نورك أطفا الكهربا لوووول
يا مرحبا بك .. والله ياليتني كنت مرشد فأفوز فوزاً عظيماً ^__^
تسلم على المرور ..
بالمناسبة منو دلك على الموقع ؟